EU tar i mot innspel til ny versjon av DCAT-AP

[oystein.asnes]

Semic Support Centre i EU har publisert ein ny versjon av "DCAT Application Profile for data portals in Europe" (DCAT-AP 3.0.0), og ber no om tilbakemeldingar. Formålet med standarden er å legge til rette for utveksling av beskrivelsar av datasett og datatenester (API-ar), og å lette søk etter datasett og datatenester på tvers av EU-landa.

Alle som vil kan gje sine innspel til den nye versjonen direkte til Semic Support Centre. Digdir koordinerer altså ikkje innspel frå Norge, men vi gir våre eventuelle tilbakemeldingar på lik linje med andre.

Den norske utgåva "Standard for beskrivelse av datasett, datatjenester og datakataloger" (DCAT-AP-NO) er anbefalt standard for offentleg sektor i Referansekatalogen for IT-standardar. Standarden gjer det muleg å hauste datakatalogar frå offentlege verksemder og tilby ei nasjonal oversikt på data.norge.no. Den nasjonale datakatalogen vert også utveksla med den europeiske dataportalen data.europa.eu.

DCAT-AP-NO er basert på EU sin DCAT-AP, og alle norske avvik må være kompatible med denne. Arbeidet med å revidere den norske standarden startar opp i løpet av fjerde kvartal 2023.

På joinup.ec.europa.eu finn du meir informasjon om versjon 3.0.0 av DCAT-AP og korleis du gir innspel.